Вевчани под маска

Со звукот на тапанот и зурлата на двете групи, „Долно“ и „Горно“ маало, започна василичарскиот вевчански карневал.

Од најмало  до најстаро денеска во Вевчани беа под маска. Преку неа василичарите го покажуваа своето второ лице, и секој ги искажа  сопствените  мисли, чувства и желби. Се толкуваа политичките настани кај нас и во светот. На дефилето не изостана и сатиричното видување на спорот за името со Грција. Традициолно,први на маскенбалот продефилираа Глупавиот Август како и Зетот и Невеста од двете вевчански маала.

Иако василичарите се исмеваа на случувањата во државава како и на одредени политичари, сепак тоа се прави на специфичен начин,  кој воопшто не предизвикува реакции кај сите нас, вели министерот за култура. Вевчанскиот карневал важи за една од најголемите манифестации во државава, и преку него   се афирмираат  етнолошките моменти од нашата култура, додаде таа.

Покрај првиот човек на културата, Вевчанскиот карневал со своето  присуство го удостоиа и повеќе политичари како и претставници на дипломатскиот кор. Но за разлика од минатите години, сега очигледно беше дека бројот на посетители е многу помал.

Вевчанскиот карневал бил и ќе остане гордост на нашава земја, вели првиот човек на општината. Василичарите знаат со малку работи да пренесат големи пораки ширум целиот свет, всушност тоа е и јавната тајна на овој карневал, додаде Радиноски.
 

 

 

 

 

 

{loadposition content9}