Христијанските верници денес го празнуваат Вознесението Христово. Во Горно Лакочереј беше преосветена манастирската црква во манастирот Св Спас. По светата архиерејска литургија Владиката Тимотеј ги освети и новоизградените конаци. Убаво уредниот простор околу манастирот со сите придружни објекти беше исполнет со голем број верници. Меѓу бројните посетители беше и охридскиот градоначланик Никола Бакрачески со неговите соработници и директори на неколку јавни претпријатија.
Манастирскиот амбиент сместен во зеленилото на околната шума, дишеше со духовност и смирение. Посетителите не останаа рамнодушни на убавата околина и изградените конаци.
Манастирот Вознесение Господово во Горно Лакочереј сместен во прекрасна околина датира од 14 век. Верниците често го посетуваат храмот и бараат духовен мир, но најпосетен е на истоимениот празник, кој го менува датумот, но не и денот, а се слави шест недели после Велигден. Црковниот одбор од Горно Лакочереј постојано се труди да го оплеменува и да го направи манастирскиот комплекс што попривлечен за верниците. Со средства од Митролопијата се изградени конаци со 15 соби и сала за свечености со капацитет од 300 гости, вели Александар Крстев благајник на Црковниот одбор. 
„ Неговото значење за Горно Лакочереј е огромно. Посебно последните години кога во тренд е манастирскиот туризам и руралниот туризам. Со новите конаци сме подготвени да ги примиме туристи од кои бенефит ќе имаат сите селани од околината и од Горно Лакочереј“, напоменува Крстев.
На годинешнот прославување на празникот Христово вознесение имаше и тројца кумови, Александар Попоски, Иво Јованоски и Александар Трајкоски кои се погрижија празникот да биде што посвечено одбележан. Празнувањето започна од синоќа кога верниците ги забавуваше естрадниот уметник Јордан Митев.
