Без струја, со рачно ѕвоно кое го означува почетокот на часовите, без неопходните компјутери и интернет конекција потребни за функционирањето на училиштата.
Струшките основни училишта продолжуваат со функционирање во овие отежнати услови. Основците од „Браќа Миладиновци“ според најавеното денес го бојкотираа првиот час од наставата, додека останатите часови ги држеа скратено со цел да се заврши пред да падне првиот мрак и со тоа да изчезне и последната надеж за нормална настава. Од таму велат дека се надеваат на скоро решавање на проблемот. Слична ситуацијата и во основното училиште „Јосип Броз Тито“. Директорот на ова училиште, Тони Савески, во телефонски разговор не информираше дека скратени часови се одвиваат и во ова училиште. Савески вели дека за утрешниот ден се предвидени преговори на локалната од Струга со ЕВН Македонија со цел нормализирање на состојбите во струшките основни училишта.
Според Савески сеуште постои поделеност кај родителите околу тоа дали да се продолжи со настава со скратени часови или пак да настапи целосен бојкот на наставата до нормализирање на состојбите. За утрешниот ден, Савески вели дека имаат закажано и совет на родители на кој меѓу другото ќе дискутираат и по ова прашање. Пред само два дена, градоначалникот на Струга, Зијадин Села изрази подготвеност доколку тоа биде договорено со ЕВН Македонија, локалната на рати да го исплаќа не само досегашниот долг од 6 милиони и 300 илјади денари, туку и новонастанатиот долг од 2 милиони денари поради блокираните сметки на основните училишта. Инаку за денес и утре беше најавен бојкот на првиот час во основните училишта, додека за од понеделник и целосен бојкот на наставата.
