Големиот светец Св Климент Охридски со своето дело оставил завет за сите нас, да се стремиме кон доброто, убавото, она што значи етика, морал, солидарност и трајна вредност за еден народ. Оваа порака доаѓа од првиот човек на градот Никола Бакрачески кој утринава се поклони пред моштите на Св. Климент Охридски на Плаошник. Со тоа продолжија активностите по повод чествувањето на патронот на градот.
„Токму на ова место каде што денес се наоѓаме живеел и творел Св Климент Охридски и заедно со Св Наум Охридски и создал трајни вредности за градот Охрид уште пред 10 векови кога Охрид во тоа време бил еден од најзначајните Европски центри во делот на образованието едукација на народот, ширењето на духовните и традиционални вредности“.-изјави Никола Бакрачески,Градоначалник на Охрид.
Свежо цвеќе беше положено и пред споменикот на Св Климент Охридски во дворот на истоименото основно училиште. 
„Денеска денот ни е убав, направивме една мала приредба пред споменикот со нашите ученици од петто одделение, а потоа следуваат и други активности. -изјави Јордан Пуроски – директор на ОУ „Св Климент Охридски“.
Општинската делегација денес положи свежо цвеќе и пред споменикот на Св Климент Охридски на градскиот плоштад. Покрај нив свежо цвеќе положија делегации на дел од збратимените градови со Охрид, политичките партии, Охридска Капетанија и Сојузот на борците од НОБ. Активностите по повод чествувањето на патронот на градот ќе бидат завршени со Свечената академија – во чест на Св. Климент Охридски, заштитникот на Охрид. На неа ќе бидат врачени највисоките општински признанија, награда и повелба „Св. Климент Охридски – Патрон на градот. Присутните ќе имаат можност да го проследат и концертот на Синтезис.
