Дивите депонии го гушат Лабуништа и околните струшки села. Лабуништани сакаат да се исчисти дивата депонија која е лоцирана над селото, од каде постојано се шири неподнослива смрдеа и го отежнува дишењето посебно во летниот период. Директорот на ЈП „Хигиена“ Исмет Лапоски, вели дека цел тим од 15 луѓе се ангажираат околу хигиената и одлагањето на сметот во селото, но нагласи дека како претпријатие се судруваат и со низа проблеми. Пред се тој смета дека сеуште многу треба да се работи на подигање на свеста кај населението за јавната чистота, но и изградбата на дива депонија е сериозно прашање кое треба час поскоро да се реши.
„Неопходна е регионална депонија, гледаме дека ниту во Струга не и местото таму, мора да се направи една регионална депонија која ќе биде од интерес за сите граѓани и истата да биде на едно место и на природата да не и нанесува штета“ – вели Лапоски.
И Абдула Ќазимоски жител на Лабуништа кој во моментов е претседател на струшкиот Совет вели дека се залагаат час поскоро да се реши проблемот со изградба на регионална депонија, за што лично смета дека и струшкиот градоначалник Зијадин Села почнал сериозно да размислува. Тој вели дека овој проблем и тоа како е сериозен но спрред него државата е таа која треба да даде амин за тоа.
„Се обидуваат да направат напори за да го решат проблемот но тоа треба да биде практични и малку поактивно треба да се инвесртира во тој поглед. Сметам дека во прашање се инвестициите каде треба да се инвестира малку повеќе а тие како да имаат змии во џебовите инвестираат за свои политички цели. Јас би изразил голема благодарност дали оваа или следната власт го реши проблемот со сметото во нашето општество“ – нагласи Ќазимоски.
Во Лабуништа подигањето на отпадот се врши во 6 реони и секој ден луѓето го изнесуваат пред домовите во канти и кеси за отпадоци, од каде екипите го подигаат и го носат на депонијата над селото, информираа од ЈП. Додаваат дека имаат добра наплата која посебно последнава година е за 30% повисока во споредба со минатото.
