Во Еквадор во тек се спасувачките операции за извлекување на заробените под урнатините, откако јужноамериканската држава беше погодена од најсилниот земјотрес во последните неколку децении, при што загинаа над 200 луѓе, а стотици се повредени.
Земјотрес со магнитуда од 7,8 степени удри во близина на еквадорскиот пацифички брег, 170 километри северозападно од престолнината Кито, предизвикувајќи смрт и уништување во Манта, Портовиехо, Педерналес, Гајакил и други крајбрежни градови и села.
Бројката на загинати се искачи на 233, соопшти еквадорскиот претседател Рафаел Кореа. „Целата земја е мобилизирана. Му благодариме на целиот свет за солидарноста“, напиша тој на Твитер.
Над 1.500 луѓе биле повредени во земјотресот, јавија еквадорските власти.
Кореа, кој ја прекина својата посета на Рим и се врати во Еквадор, прогласи вонредна состојба во шест провинции.
„Главниот приоритет е да се спасат луѓето заробени под урнатините. Сѐ друго може да се изгради, но животите не можат да се вратат, и тоа е тоа што најмногу боли“, кажа еквадорскиот претседател.
„Сѐ уште има луѓе заробени на различни места и спасувачките акции се во тек“, соопшти еквадорскиот потпретседател Хорхе Глас, пренесува Ројтерс. „Најважно е Еквадорците да останат смирени за време на вонредната состојба.
Околу 10.000 војници и 4.600 полицајци се ангажирани да им помагаат на спасувачите. Венецуела, Мексико и Чиле испратија екипи и намирници во Еквадор како дел од меѓународната помош.
