Ќе се подобруваат пристапните места за лицата со попреченост до музејските збирки во градов. Завод и музеј како и невладините организации имаат можност да аплицираат со проекти за добивање грантови во висина до 4000 евра за оваа намена. Рокот за аплицирање е до 4 мај. Проектите се финансирани од фондацијата Ставрос Ниаркос.
Рокот е краток за аплицирање затоа ги повикувам сите заинтересирани невладини организации кои се во можност да изготват ваков проект да го сторат тоа и да го достават до Завод и музеј па ние ќе аплицираме во нивно име, објаснува Горан Патчев-архитект при Завод и музеј.
Завод и музеј преку вакви мали грантови аплицираше и доби средства за два проекти. Тоа беше изградбата на реплика на охридскиот чун и проект со наслов „Допри ја културата, почувствувај ја уметноста“ кој Завод от го изработи заедно со Здружението за слепи лица од Охрид а беше финансиран од фондацијата Ставрос Ниаркос во партнерство со Шведската организација „Културно наследство без граници“. Со овој проект требаше да им се овозможи на слепите лица и лицата со оштетен вид подобар пристап до просториите со музејските збирки и експонати во Охрид.
Овие два проекти се завршени, но отворија можност за нивно надградување. Особено вториот кој е наменет за лицата со оштетен вид. Постојано пристигнуваат нови идеи од здруженијата за слепи лица и тие можат да се инкорпорираат во пракса. Соработката со невладините организации и граѓанските здруженија ни е од исклучителна важност при реализација на ваквите проекти, вели Патчев.
За реализираните проекти и за идните планови се разговараше на четвртата годишна конференција “Запознај, види, направи” која се одржa во Скадар, Албанија. Конференцијата е организирана од Балканската мрежа на музеи, мрежа на повеќе од 40 музејски институции од Балканот и Фондацијата Културно наследство без граници.К онференцијата е организирана за поттикнување на прекуграничната соработка и размена меѓу музејски професионалци и професионалци за културно наследство на Балканот. Тоа е место за учење и споделување и одлично место за градење на партнерства. На “Запознај,види, направи” , исто така, се слави важната улога на музеите која ја играат во нашите општества.
