Земјите од регионот заеднички ќе делуваат во справувањето со компјутерскиот криминал благодарение на проектот iPROCEEDS кој ќе се спроведува во соработка Советот на Европа и Европската Унија. Министерот за внатрешни работи на Република Македонија, Митко Чавков, вели дека тие очекуваат соодветни бенефити од овој заеднички настап на земјите од регионот во превенирањето, но и во борбата против компјутерскиот криминал.
„Прекуграничниот аспект практично ни ја наметнува потребата од таков пристап во справувањето со овој вид на криминал и јас се надевам дека со отпочнувањето на овој проект уште повеќе ќе се подигне не само свесноста за неопходната соработка меѓу органите за спроведување на законот, правосудството и бизнис секторот, туку ќе се зајакнат и националните капацитети и во Република Македонија, и во државите кои партиципираат во овој регионален проект.“-вели министерот за внатрешни работи, Митко Чавков.
Поврзувањето на капацитетите кои делуваат во спречувањето и откривањето на компјутерскиот криминал е клучно, според Александер Сегер, раководител на Одделението за сајбер криминал во Советот на Европа.
„Ова е генерален проблем, премалку се знае за истрагите кои се водат и премалку има информирање на полицијата и статистички податоци за истраги во тек, многу малку се знае и за истрагите на обвинителствата и какви се судските пресуди. Дури и во земји каде имате статистика на истраги и гонења по тој основ, тие меѓусебно не се поврзани. Тешко дека има воопшто земја во која оние кои ја започнале истрагата, па и оние кои покренале обвиниенија на крајот да ја дознаат пресудата за нивните истраги и гонења.“-рече Сегер.
Одговорниот за сајбер криминал при МВР, Марјан Стојкоски смета дека финансискиот сектор во земјава има капацитети за борба против сајбер криминалците.
„Нашиот финансиски сектор и приватните компании сигурно си имаат капацитети кои што се грижат за безбедноста на своите системи, ги идентификуваат сите потенцијални напади како и моментални напади што се случуваат на нивната структура и соодветно одговараат. Во одредени случаи истото го пријавуваат во МВР, Секторот за компјутерски криминал кои што ние понатаму ги истражуваме тие кривични дела во соработка со Јавното обвинителство.“-изјави Стојкоски.
Проектот iPROCEEDS е проект кој ќе се спроведува покрај во нашата земја уште и во Албанија, Босна и Херцеговина, Црна Гора, Србија, Косово и Турција. Истиот е насочен кон создавање цврста и стабилна соработка и со Европската Унија и Советот на Европа со цел применување на потребните регулативи и процедури за таргетирање на криминалните приноси од интернет токму во Југоистична Европа и е дел од ИПА програмата на Европската Унија.
