Се прават завршните подготовки за учество на НУ “Завод за заштита на спомениците и музеј – Охрид“ на Форумот на словенските култури во Блед. Во видео презентација ќе биде прикажан дел од огромното културно наследство кое го има Охрид, а во кој ќе бидат претставени Куќата на Робевци, на Христо Узунов и Григор Прличев, како и Галеријата на икони, Самоиловата тврдина, ранохристијанските базилики, Музејот на вода, набројува кустосот Милчо Георгиески.
„Сега сме во фаза на подготовка на видео материјалот за да ја претставиме институцијата и нашата работа. Тешко е од огромното богатство да го собереме во 5 минути , но тие презентации се ограничени. Ние се трудиме најквалитено и најрепрезентативно сетоа она што го располагаме и достојно да го презентираме“, вели Георгиески.
Охридскиот завод и музеј за прв пат ќе учествува на Форумот на словенската култура. Поддршката ја имаат од ресорното министерство. Аплицирале во јануари, а во април допатувала жири комисија која дала дозвола за учество на форумот. На манифестацијата се доделува и наградата Жива и тоа во 6 категории за најуспешните музеи, а охридскиот музеј има извесни очекувања, вели Георгиески.
„Ние сме единстената институција како завод за заштита и музеј. Останатите учесници се музеи и се специјализирани за една одредена област. Ние само како музеј имаме неколку типа археолошки локалитети, Галерија и други музејски збирки. Но, самото учество на форумот е и еден вид награда“, појаснува Георгиески.
„Форум на словенски култури“ е непрофитна организација формирана во Љубљана , Словенија во 2004 година. Во него влегуваат 13 словенски, европски земји како што се покрај Македонија, Бугарија, Србија, БиХ, Хрватска, Чешка , Русија, Словачка и други.
Форумот ќе се одржи од 20 до 24 септември во Блед.
