Локалната самоуправа и градоначалникот Стојаноски не се грижат ниту за изнаоѓање форми за поефикасно и поекономично одвивање на образовниот процес, ниту за подобрување на условите во училиштата, обвини портпаролот на охридскиот комитет на ВМРО ДПМНЕ, Перчо Божиновски. Со измена на развојната програма за активностите на општина Охрид во областа на образованието за 2018 – 2020 година, односно со ребалансот на буџетот се намалуваат средствата кои беа предвидени за реконструкција на кровот на ОСУ „Св.Климент Охридски“, посочи Божиновски.
„Како долгогодишен просветен работник вклучен во образовниот процес, пратеничката Жаклина Лазаревска треба да чувствува одговорност за нешто коешто е ветено на колегите и учениците во Гимназијата. Нели заложбите беа токму санација на кровот во ОСУ„Св.Климент Охридски“? Замислете, вкупниот износ на предвидени средства се намалува за 3.500.000,00 денари со што е ставена во прашање реконструкцијата.“ – кажа Божиновски.
Од ВМРО ДПМНЕ бараат одговор од градоначалникот зошто сѐ уште не била извршена дренажа во ОУ „Братство и Единство“?
Понатаму прашуваат зошто се дозволи единствено учениците од Охрид од целата држава да не учествуваат на државните натпревари по математика.
„За СДСМ зборот не е збор. СДСМ нема ниту идеи, ниту визија, ниту програми и проекти во образованието. На СДСМ и градоначалникот Стојаноски не им е важно образованието, тие ги кратат парите за образованието.“ – обвини Божиновски.
Локалната Самоуправа предводена од СДСМ и градоначалникот Стојаноски воопшто не се стреми кон задоволување на потребите и интересите во областа на образованието и тоа го чувствуваат учениците, наставниците и родителите преку стопирање на сите проекти започнати од ВМРО-ДПМНЕ, кажа Божиновски.
