Северниот влез во Охрид наскоро ќе добие современ изглед. Со претходна одлука на градскиот совет, Локалната самоуправа обезбеди изведување на инфраструктурни проекти за поголема безбедност на пешаците и велосипедистите со изградба на тротоари и велосипедски патеки на 15 ти Корпус. Во меѓувреме и ЈП за Државни патишта минатата недела ја заврши постапката за избор на изведувач на рекoнструкцијата на оваа улица, инфoрмира охридскиот градоначалник Константин Георгиески.
„Избран е изведувач на горниот слој на улицата за износ од 30 милиони денари. Остатокот од инвестицијата ќе биде од општинскиот буџет од околу 30 милиони денари за улицата 15 -ти Копрус. Очекувме работите да отпочнат во месец декември“, укажува Георгиески.
Подобрување на инфраструктурата се планира и со зафати на уште две поголеми сообраќајници како што се Абас Емин и 7 ми Ноември, но ќе се поправаат и други градски улици. За таа намена локалната самоуправа предвиде средства во буџетот. Во општинскиот буџет за 2020 година ќе се издвојат средства и за изградба на атмосферска канализација на улиците 7-ми Ноември и Абас Емин.
„Преку проект од Европска банка за обнова и развој во завршна фаза е распишување на тендер за улицата Абас Емин. Добивме уште 5 прашања оваа недела од консултантот и ги одговоривме. Очекуваме да се распише тендер од министерството за транспорт и врски. Додека за горниот слој се планирани средства од Светска банка кои се обезбедени за Охрид во износ од 1 милион и 280 илјади евра и очекуваме наскоро да почне и овој покрупен проект, “напоменува Георгиески.
Покрај овие три поголеми сообраќајници се планирани и реконструкција и на улиците Марко Цепенков, Охридски бригади, Прва Македонска ударна бригада и на повеќе улици во населбата Христо Узунов. Се планира и изградба на нови паркинг места, партерно уредување на плоштадот Крушевска Република, реализација на првата фаза од изградбата на речното корито на Грашница од Булевар Туристичка до Желзничка, како и изградба и реконструкција на детски игралишта.
