Уметнички платна, видео инсталции, облека, фотографии се дел од изложбата „Мапирање на душата“ од Марина Коцарева Ранисављев. Професор Коцарева Ранисављев уметник, сликар и моден дизајнер, автор на книгата „Мода и облека“, се претставува со интересна мултимедијална изложба во Куќата на Робевци. На посетителите им нуди незаборавно патување низ минатото. Уметникот вели, ме инспирира градот во кој сум родена и неговата традиција. Среќна е што поставката се вклопила во музејскиот амбиент, со што се потврдува, дека ништо не е случајно во животот и творештвото, вели професор Марина Коцарева Ранисављев.
„Посебно кога видов колку е поврзана изложбата со етно поставката во музејот на Робевци, каде што видов стари фотографии, облека со етно призвук, со граѓански носии и се тоа е основа на она што го работам како теорија и пракса“.
Нејзиниот љубопитен, уметнички дух постојано ја води од еден медиум во друг, да се занимава со она што ја интересира и каде што може да истражува. Покрај штафелајското сликарство, уметничките инсталации тука е и модниот дизајн. Коцарева Ранисављев споделува дека резулата на нејзината теоретска работа е авторската книга Мода и облека. Има психо -социолошки аспект на облекувањето и модата и одговор на прашањата зошто правиме избор како да се претставиме пред околината. Открива дека и причинуваат задоволство и ја исполнуваат во творештвото повеќе уметнички области.
„Треба секогаш да се прати она што е автентично околу нас и во нас. Само тогаш ќе создаваме вистински уметнички дела кои ќе имаат вредност. Секој уметник и творец би требало да размислува на тој начин“.
Нејзината поставка „Мапирање на душата“ ќе биде отворена до почетокот на месец септември.
Марина Коцарева Ранисављев е родена во Охрид, а сега живее и работи во Белград како професор на Академијата на Техничко – уметнички студии по моден дизајн.
