„Охридски пливачки легенди“ е насловот на документарниот филм посветен на Нико Нестор, Климе Савин, Дики и Атина Бојаџи, 4 -та најдобри охридски пливачи во дисциплината маратон, вели авторот Љупчо Паункоски. Се надевам дека филмот ќе придонесе младите да се занимаваат со овој спорт и да се врати пливачкиот сјај на градот. Филмот е направен за 4ца кои потекнуваат од нашиот град и кои со своите достигнувања треба да останат засекогаш запаметени, вели Паункоски.
„Се работи за извонредни пливачи кои во своето време го преставува нашиот град и држава, не само во границите на тогашна Југословија туку и надвор од државата и учествуваа на сите светски маратони“.
Филмот трае околу еден час , а монтажата на документарецот е на Томе Лушев Шпанец. Филмот е работен макотрпно во смисла на прибирање на сите нивни спортски резултати, вели Паункоски. Во тоа многу ми помогна пливачката легенда, тренерот Александар Леко Радиќ .
„Еден час не е доволно да се опишат сите нивни успеси, но се потрудив да опфатам се што е најбитно во нивната спортска кариера. За мене е многу важно што имав можност да се сретнам со сега покојниот Леко Радиќ, кој е главен соговорник во филмот. Тој ми даде многу информации, фотографии, весници кои излегувале во тоа време и го прави филмот многу поинтересен“.
Документарецот „Охридски пливачки легенди“ премиерно ќе биде прикажан во охридската кино сала утревечер во 18 часот, според сите безбедносни протоколи. Влезот е бесплатен. Паункоски упатува благодарност до Охридскиот центар за култура и Кинотека на Македонија.
„Охридски пливачки легенди“ е 6-ти авторски филм на Љупчо Паункоски. Од нив 3 докуметраци се посветени на струшката област Малесија, за киното „Охридско Езеро“ и за охридскиот музичар Наум Гаврилоски.
