Да биде стопирана изградбата на новиот хотел на локалитетот “Горица“ во Охрид, на место на ресторанот на веќе срушениот “Хотел Парк“се до објавување на проектот за хотелот и стручна анализа на усогласеноста на урбанистичкиот план со плановите од повисоко ниво, бара Асоцијацијата на архитекти на Македонија.
„Во време кога се соочуваме со опасност од одземање на статусот на Охрид и охридскиот регион како природно и културно наследство на УНЕСКО, односно наследство во опасност, сметаме и го охрабруваме Градоначалникот на Општина Охрид и сите надлежни институции (локални и национални) да постапуваат согласно и исклучиво со законските уредби, пропишаните правила и прописи“- стои во соопштениеот од Асоцијацијата.
Од асоцијацијата апелираат на транспарентност на локалната самоуправа за активностите кои ги превзема.
Целата е јавноста да има увид во постапката за изградба на планираниот објект “Хотел“ со катност П+3, особено во:
– Урбанистичкиот план за локалитетот од 2009 година (кој не даден на јавен увид на веб-страната на Општина Охрид);
– Мислењето од Националната комисија за УНЕСКО;
– Водостопанската согласност од Министерството за животна средина со која се дава дозвола за градба на објект во заштитениот појас со ширина од 50 м’ од највисокиот водостој на Охридското Езеро.
Од аспект на доследното и стручно работење на институциите ААМ прашува дали се синхорнизирани и усогласени Урбанистичкиот план од 2009 година (како план од пониско ниво) со Плановите од повисоко ниво и тоа:Простоен план на Република Македонија;Просторен план на Охридско-Преспанскиот регион;Планот за управување со Охридскиот регион; Планот за управување со Националниот парк Галичица. Како и Стручна анализа за усогласеност на урбанистичкиот план со законската регулатива која го уредува планирањето и која го допира истото:Законот за урбанистичко планирање;Законот за градење;Закон за заштита на природата;Закон за управување со светското природно и културно наследство на Охридскиот регион;Закон за заштита на Охридското, Преспанското и Дојранското Езеро;Закон за води.
„Дополнително, проблемот се усложнува и со фактот дека се отпочнати дури и градежни активности и покрај тоа што е надминат законскиот рок за отпочнување со градба најмногу 2 години од издавањето на одобрението за градење согласно Член 66 од Законот за градење. Во него се пропишува дека доколку е надминат рокот издаденото одобрение за градење е неважечко, а идната градба бесправна.“– велат од ААМ.
Постојниот објект, за кого е предвидено негово рушење, претставува наградено репрезентативно архитектонско дело на Архитект Павел Балабан од страна на ААМ на БИМАС во 1989 година, кое со својата форма, дизајн, габарит и функција внимателно создава симбиоза меѓу природата и артифициелното, односно Охридското езеро и околината со автентичната (уникатна) охридска архитектурата од 20-от век.
