На денешната седница на Градскиот совет се формираа работни комисии. Беа именувани претседатели и членови на единаесет општински комисии меѓу кои статутарно-правната, комисија за финансии и буџет, за туризам и локален економски развој, за млади и спорт, за еднакви можности меѓу мажите и жените и други. На втората седница на советот беше верифициран и мандатот на советникот Нефи Усеини.
Усеини е по втор пат советник во општина Охрид од редовите на ДУИ, а во минатиот мандат се повлече од функцијата. Деновиве, најави дека и овој пат ќе се повлече од советот, но денес изјави дека сеуште нема донесено конечна одлука.
Ќе имаме состанок со партијата и ќе донесеме одлука дали ќе дадам оставка или ќе продолжам понатаму. Во моментов ќе продолжам како советник ако има промена ќе бидете информирани – истакна Усеини.
Мнозинството во охридскиот совет го има ВМРО ДПМНЕ и коалицијата, а ДУИ не е дел од таа коалиција. Усеини не открива како ќе делуваат во Советот и кого ќе го поддржат на локално ниво во работата на Советот. Напомена дека и тоа ќе зависи од партиската одлука на ДУИ.
