Европа денеска го одбележува својот ден – 9 Мај, европски симбол, што заедно со заедничката валута – еврото, знамето и химната, го претставуваат политичкиот идентитет на Европската унија. На овој ден во 1950 година Роберт Шуман го презентираше предлогот за создавање на обединета Европа, како опција за одржување на мирот на со војните разурнатиот и поделен континент. Предлогот, попознат како „Шуманова декларација“, се смета за почеток на формирањето на она што го денеска го знаеме како Европска унија.
Европското движење на Република Македонија денеска организира Свечена академија на која на маестро Симон Трпчески ќе му биде доделена годишната награда за Европски придонес за 2008 година. Наградата традиционално се доделува за посебни заслуги за промовирање на Република Македонија и нејзината култура во Европа, како и за промовирање на европската идеја и вредности.
По повод Денот на Европа, денеска на Универзитетот за аудиовизуелни уметности ЕСРА во Скопје ќе се одржи Отворен ден на ЕСРА, каде што ќе бидат промовирани новите ТВ и Аудио студија.
Асоцијацијата за култура ИКОН, пак, по повод роденденот на Европа, ќе одржи ликовна работилница, во која ќе учествуваат уметници од различна етничка припадност, со цел „спојување на различностите во едно заедништво“.
Во пресрет на Денот на Европа, вчера во центарот на Скопје беше одржан хепенинг „Денес тука, утре во Европа“, организиран од Мисијата на Европската унија во Скопје и општината Центар. На платото пред Домот на Армијата се обратија евроамбасадорот Ерван Фуере и градоначалникот на Центар Владимир Тодоровиќ.
По повод Денот на Европа – 9 Мај, во рамки на европската кампања за претприемништво, вчера се одржа и Европски ден на претприемачот. Претприемачите, на конференцијата можеа да се запознаат со можностите што ги нуди Европскиот информативен и иновативен центар во Македонија и услугите што можат бесплатно да ги добијат од нив, како и со можностите за пристап до финансиски средства.
{loadposition content9}
