Со авион на компанијата „Камаир“ синоќа преку Тбилиси, Грузија на Меѓународниот аеродром Скопје пристигнаа првите 149 граѓани на Авганистан што ќе бидат прифатени во нашата земја. Веднаш по слетувањето жена во 39-тата недела бременост, нејзиниот сопруг и дете со возило на Итната помош беа однесени на Гинеколошката клиника во Скопје за контрола. Со друго возило беше спроведено лице за кое најверојатно станува збор за колапс.

Има тренд на опаѓање на бројките на новозаразени со коронавирус, изјави денеска министерот за здравство Венко Филипче, изразувајќи очекување дека ќе продолжи да спласнува овој бран на епидемијата.

Со поставување камен темелник денеска во близина на Охрид ќе биде означен почетокот на изградбата на 400 – киловолтниот далновод Битола (Северна Македонија) – Елбасан (Албанија), како дел од Коридорот 8.

Од Министерство за здравство за 24 годишниот пациент од Ресен кој почина како последица на Ковид-19 велат дека тој на инфективното одделение во болницата во Битола бил примен на 24 август како суспектен на болеста. Пациентот, според министерството, имал ниска сатурација и отежнато дишење, биле направени сите потребни лекарски проверки, притоа тој имал масивна бронхопневмонија, ниска сатурација и веднаш му била дадена терапија и бил ставен на кислородна поддршка.

Актуелниот градоначалник на Куманово, Максим Димитриевски, ќе се кандидира за втор мандат, но овојпат како независен кандидат. Тој ја потврди информрацијата за „360 степени“ и вели дека процедурата за собирање на потписи е отпочната.

Министерството за здравство информира, согласно податоците од Институтот за јавно здравје, во последните 24 часа се направени 5.982 тестирања, а регистрирани се 1.082 нови случаи на КОВИД-19.

Владиниот портпарол Душко Арсовски соопшти дека во земјава ќе бидат згрижени вкупно 780 граѓани на Авганистан.

Ако нема доволно реонски попишувачи, за пописот ќе бидат ангажирани и административци вработени со договор на дело – со оваа владина одлука државните институции ќе имаат обврска да понудат кадар на Државниот завод за статистика во септември за време на пописот.