Паричка за среќа и бериќет
„Каде и да си, пред Божик, зад Божик, дома да си“. Бадник е празник кога семејството се собира заедно во домот, седнува на заедничка богата посна трпеза и крши лепче со паричка.
| | Македонија
![Badnikova trpeza](/wp-content/themes/yootheme/cache/2f/makedonija_2011_januari_badnik-2f0f40f0.jpeg?x28309)
Бадникова трпеза
![Бадникова трпеза Badnikova trpeza](https://tvmohrid.com/wp-content/uploads/2011/01/makedonija_2011_januari_badnik-vecera.jpg)
Утрово, веројатно, ве разбудија звуците од традиционалната коледарска песна, насмеани дечиња и ладни рачиња. Коледарчињата, предвесници на Христовото раѓање, сигурно ги почестивте со некоја паричка, јаболче, костенче, бомбонче и ги испративте со желби за добро здравје, бериќет и благосостојба во домот. Православните христијани може да ја започнат подготовката за вечерашната прослава на Бадник, ден пред големиот христијански празник, Божик.
„Каде и да си, пред Божиќ, зад Божиќ, дома да си“, велат старите, а оваа поговорка ја почитуваат и помладите. Бадник е празник кога семејството се собира заедно во домот, седнува на заедничка посна и богата трпеза и крши лепче со паричка. Се верува дека на оној кому ќе му се падне паричката, цела наредна година ќе го следи здравје, успех и среќа. Традицијата налага оваа вечер да не се оди никаде на гости, туку да се остане во домот со богато посно мени што има и симболично значење означувајќи богатство и изобилство и во наредната година.
Бадниковата вечера започнува со благослов на домаќинот на трпезата, а потоа и кршење на бадниковото лепче со паричка, на онолку делови колку што има и членови во семејството, оставајќи дел за Бога и дел за куќата. На Бадник, според традицијата, во огнот се става да гори и бадниково гранче, кое се смета за најздраво дрво и кое симболизира здравје за целото семејство.
Јадењата на бадниковата вечера се исклучиво посни, а меѓу нив има лепче, риба, грав, салата од зелка, туршија, сармички, посни пити и банички, вино, компири, посни колачиња и торти… Обичај е трпезата да не се раскрева и да се остави да стои преку целата ноќ.
{loadposition content9}