Собранието го донесе Законот за игрите на среќа со 60 гласа „за“

Собранието го усвои Законот за игрите на среќа и за забавните игри со 60 гласа „за“ и 20 „против“. Заменик-министерот за финансии Николче Јанкуловски изјави дека законот предвидува дислокација на објектите за игри на среќа на најмалку 500 метри од основните и средните училишта, мерено по најбезбедниот пат.

Со законот значително се ограничува рекламирањето, се укинуваат светлечките реклами, а ќе биде дозволена само табла со назив на приредувачот со максимални димензии од 100 на 30 сантиметри, без промотивни пораки.

Дополнително, се воведува задолжително GPS-поврзување на апаратите и казината со Управата за јавни приходи за подобра контрола и полесно откривање на нелиценцирани објекти. Законот е усогласен и со препораките на Moneyval за спречување перење пари и финансирање тероризам.

Јанкуловски најави дека доколку при примената се утврдат аномалии, ќе се пристапи кон измени на законските решенија.