Државниот испитен центар се обрати со соопштение по повод одлуката на министерот Шаќири дека матура мора да има. Синдикатот на Државниот испитен центар во пишано соопштение упати пораки до матурантите и до министерот за образование и наука и објави дека го става штрајкот во мирување.
Од ДИЦ упатија порака до матурантите:
Насилните мерки и притисоци на министерот Шаќири со обид да внесе надворешни лица во процесот на државната матура – процес кој е со висок степен на тајност, ќе ја доведе во прашање валидноста на тестирањето и резултатите од матурата.
Вработените во Државниот испитен центар, како експерти во областа и лица со висок интегритет и чувство за општествена одговорност, одлучија да ја одложат борбата за своите права за достоинствен живот во корист на вашата иднина.
Со ова известување штрајкот се става во мирување!
Од ДИЦ се обратија и до министерот за образование и наука:
Вашите досегашни обиди за решенија на проблемот, а со тоа и ветувањата кои им ги дадовте на матурантите во медиумите се спротивни на одредбите на Правилникот за процедури за тајноста на подготовката, печатењето, дистрибуцијата, чувањето и оценувањето на испитниот материјал, донесен од министер за образование и наука од 31.3.2014 година.
Со Вашиот обид да реализирате матура без вклученост на вработените на ДИЦ, Вие ќе бевте тој што ќе ги оштетеше матурантите!“, стои во соопштението на ДИЦ.
