Почна вакцинацијата против сезонски грип

Сите пунктови за вакцинација располагаат со потребните количества вакцини против сезонскиот грип и се подготвени да ги примат пријавените граѓани. Ова го истакна министерот за здравство, Сашо Клековски, кој со примањето на вакцината го означи почетокот на имунизацијата.

– Вакцинацијата против сезонски грип е најдобра и најефикасна мерка за превенција на ова заболување. Токму затоа денеска со личен пример укажав на важноста од навремената заштита на здравјето, посебно кај ризичните групи население. Вакцинацијата докажано спречува појава на потешки форми, компликации и смртен исход од ова заболување, посочи Клековски.

Во моментов се користат 30 илјади вакцини обезбедени како заем од Албанија, преку УНИЦЕФ. По нивното искористување, се очекува да пристигнат дополнителни 26 илјади дози. Според најавите на министерот Клековски, вакцините треба да пристигнат до 15 ноември. Целта е да се обезбедат вкупно 80 илјади вакцини против сезонскиот грип.

За само една недела се пријавиле вкупно 55 илјади граѓани. Приоритет за имунизација имаат лицата над 65 години, хронично болните, здравствените работници, бремените жени и децата до петгодишна возраст. Граѓаните од ризичните групи кои сè уште не се пријавиле, тоа можат да го направат преку официјалната веб-страница vakcinacija.mk. По пријавувањето, добиваат СМС-порака со терминот и пунктот каде што треба да се вакцинираат.

Вакцинацијата во центрите за јавно здравје ќе се спроведува во рамките на нивното работно време. Лицата кои поради здравствени причини, неподвижност или инвалидитет не можат да дојдат до пунктовите, треба да се обратат кај својот матичен лекар, кој ќе организира вакцинација во домашни услови.