Мерката за замрзнување на маржите на основните прехранбени производи која истекува на крајот на месецов ќе биде продолжена до крајот на април идната година, до кога е прогласена и енергетската криза, најави министерот за економија Крешник Бектеши на денешната прес конференција.
Министерот додаде дека ако е потребно, ќе бидат преземени и други мерки во насока на намалување на цените на продуктите, иако, како што кажа, цените особено на основните прехранбени производи веќе се стабилизираат, а некои синџири маркети веќе и самите почнале да ги замрзнуваат цените на производите.
Бектеши нагласи дека за јануари се прават калкулации и со компаниите и со стопанските комори и како што додаде, се очекува дополнително намалување на цените.
Колкаво ќе биде тоа намалување ќе ве известиме навремено кога ќе ги завршиме консултациите со сите стопански комори – истакна министерот.
