Синоќа со настап на возобновениот ансамбл “Преспа” на плоштадот Гоце Делчев, во Пустец Р. Албанија, свечено беше отворено 16-тото издание на фестивалот “Македонско културно лето”.
На отворањето беше изведена претставата ЈЗУ Европа на Народен театар Штип.
Вечерва на програмата е монодрамата „Лидија или се што знам за жените“ по романот на Тихомир Јанчовски, режија и актерска игра на Игор Трпчески од Театарска Работилница Прилеп. на 29-ти и 30-ти јули ќе се одржат „Поетски слем Македонија“ и концерт на Трио Џентлмен.
Организатор на фестивалот е Здружението на Македонците со албанско потекло „Сонце“ – Скопје и Едмонд Сотир.
Фестивалот е основан со цел заштита, развој и промоција на македонската култура кај македонскиот народ во Албанија, поголема грижа од Албанија за потребите на Македонците и поголема културна соработка меѓу Албанија и Македонија.
Овој фестивал е најзначајниот и најголем културен настан на македонски јазик во Албанија. Во изминатите 16 години, со квалитетна содржина и организација фестивалот помага Преспа да прерасне во дестинација за културен туризам за што говори фактот што во последните три години фестивалот е вклучен во културната мапа на настани кои Министерството за култура на Албанија препорачува да се посетат.
