Охриѓани дишат загаден воздух, неопходно е креирање мерки соодветни на состојбата и нивно доследно спроведување

Загадувањето на воздухот во Охрид станува алармантно и градот е високо на листата како еден од најзагадените во државата. Потребен е сериозен пристап кон Планот за подобрување на квалитетот на амбиентниот воздух во општина Охрид, бидејќи здравјето на граѓаните и квалитетот на живот се од суштествено значење, истакна советничката од СДСМ, Живка Ангелоска на денешната седница при разгледување на извештајот за негова реализација. Од Извештајот може да се согледа дека не се направило ништо или се направило многу малку за подобрување на квалитетот на воздухот, посочи Ангелоска. Според неа Планот треба да биде дополнет со мерки и прилагоден на актуелната состојба со квалитетот на воздухот.

„Ниту еден советник не треба да го гласа Извештајот, не поради политичка припадност , туку секој советник да побара Планот за подобрување на квалитетот на воздухот да се дополни и она што е наведено доследно да се реализира, бидејќи кога се работи за здравјето нема простор за политика. Tреба да се дејствува и заедно за подобрување на условите. Да се направи Комисија која стриктно ќе работи заедно со службите за измена на овој План и строго да се контролира реализацијата на мерките.“ – кажа Ангелоска.

Советничката се задржа на неколку ставки од извештајот како субвенционирањето на граѓаните за набавка на инвертер клими за која намена во 2023 биле предвидени 400 000 денари, но огласот беше поништен, во 2024 општината воопшто не предвиде средства за таа намена, а за годинава се предвидени 2 мил денари кои допрва ќе се реализираат. Нема реализација и кај мерката за субвенционирање за поставување сончеви колектори, а во поглед на мерката за чистење на оџаците, советничката посочи дека треба да се размислува да се субвенционираат граѓаните за спроведување на таа активност. Потсети дека проектот за мини гасификацијата на ОУ “Григор Прличев”, Гимназијата, општинската зграда и Маларичната амбуланта сѐ уште е далеку од реализиција. Депонијата Буково продолжува да гори и да ги труе граѓаните посебно во летниот период , не помогнаа чудесните алги кои се набавуваа, палењето на депонијата никако да се санира , а дополнителен проблем е и Мауцкер која се повеќе расте, кажа советничката.

„Ако го прочитате Извештајот ќе видите дека стои „ оптимално регулирање на управување на сообраќајот во централното градско подрачје “. Тоа е на хартија , а во пракса знаете што се случува со сообраќајот во централното градско подрачје , особено во летниот период и апсолутно не соодејствува со она што е напишано во извештајот, па дури и оние улици, ете улицата покрај брегот на Охридското езеро која што беше затворена за сообраќај , се отвори. А секоја јавна површина каде што беше возможно, па и невозможно, се претвори во паркинг. Се вели дека ќе има зголемен надзор врз градежните активности на отворено за да се намалела превентивно емисијата на прашина . Во овај период кога буквално имаме градежна експанзија односно кога се градат згради на секој чекор далеку сме од реализација на таа мерка, а последиците се уште поголеми.“ – кажа Ангелоска.

Урбанистичкиот хаос е една од најголемите причини поради кои охриѓани се гушат, а сите некако како да ја премолчуваме, кажа советничката од Левица, Виолета Аврамоска.

„Секој кој има елементарно познавање од екологијата знае дека урбаниот хаос, згради кои што се изградени една до друга, каде што се затвораат прозорите и балконите на постоечките објекти, каде што е намалена циркулацијата на воздухот, а со тоа се уништува и зеленилото, се една од најважните причини поради кои охриѓани денес дишат најзагаден воздух во Македонија. Не зборувам за дивоградбите, тие се посебна приказна, туку за легално изградените градби, проблем кој 20-тина години ни се провлекува во Охрид.“ – кажа советничката Аврамоска.

Планот за амбиентен воздух е изготвен од консултантска куќа анагажирана и платена од Министерството за животна средина и просторно планирање, мерките во него се предвидени од МЖСПП во консултација со општината и слични мерки се предвидуваат за сите градови, кажа Јасминка Момироска од Одделение за животна средина на Општина Охрид. Во однос на инспекцискиот надзор, на ниво на држава изготвен е акциски план за воздух, бидејќи нема само Охрид проблеми со загадениот воздух туку сите градови, и општината се придржува до тој план, посочи Момироска.

„Ние како одделение имаме обврска неделно да доставуваме извештаи до МЖСПП и ние тоа го правиме секој петок, поткрепено со извештаи и записници од инспекторите за животна средина кои имаат засилен андзор за Б интегрирани еколошки дозволи, еколошки елаборати, на градилишта. И досега од министерството немало забелешки. Се согласувам со советничата од Левица дека урбанизацијата е голем проблем бидејќи нема циркулација на воздухот и тука не може многу да се направи, а следејќи ја мониторинг станицата најголемите пикови на загаденсот се навечер од загревањето со тврди и фосилни горива, граѓаните горат сѐ и сешто и потребно е подигнување на свеста. “ – кажа Момироска.

Момироска кажа дека Одделението за животна средина стои на располагање за сите забелешки и предлози кои ги имаат советниците за креирање мерки за подобрување на кавлитетот на амбиентниот воздух бидејќи актуелниот план е со реализација до 2027 кога ќе се носи нов. Извештајот за реализирани активности по однос на мерките предвидени во Планот за подобрување на квалитетот на амбиентниот воздух во општина Охрид беше изгласан од мнозинството во советот.