Промовирани реконструираните фасади на спомениците на културата, Куќата на Ѓурчинови, објектот на Радио Охрид и објектот на Магазата. Министерката за култура, Елизабета Канческа-Милевска вели дека станува збор за неколку значајни проекти кои се дел од програмата на министерството, а во рамките на проектот за обнова на фасади во старите градски јадра. 
„Ова се навистина значајни објекти, кои што се регистрирани како споменици на култура и кои што влегуваат во поголемиот проект на Владата, а тоа е обнова на фасадите во старите градски јадра. Мене ми е посебно драго што во овие објекти се користат истите тие објекти така да и со самите станари имавме можност да поразговараме и од нивна страна да се види чувството на една благодарност во рамките на обновата на фасадите. На сите овие три фасади е целосно завршена покривна конструкција, реновирање на фасадата, орнаментиката, дрвенаријата, така да се ставени веќе во функција и е вратен автентичниот сјај кој е карактеристичен за сите овие три фасади.“-изјави Канческа-Милевска-Министерка за култура.
Директорката на НУ „Завод на спомениците на културата и Музеј“-Охрид, Тања Паскали-Бунташеска вели дека реновирањето на фасадите на значајни објекти во градов продолжува и понатаму.
„За следната година е планирано да се конзервираат уште шест фасади односно четири во Охрид, и две во Струга. Четирите фасади кои што ќе ги конзервираме во Охрид се наоѓаат баш во центарот на старото градско јадро на улицата „Самоилова“, помеѓу Горна и Долна Порта, и црквата „Света Софија“. Исто така морам да изразам задоволство што успеавме оваа година да опремиме четири депоа, проектот за санација на депоата продолжува и наредната година, за кога е планирано комплетно да се изврши санација на ентериерот на куќата на Робевци, заедно со депоата и да се осовремени депото за современа архитектура.“ -изјави Паскали-Бунташеска.
Претседателката на Советот на општина Охрид, Гордана Коњановска вели дека реновирањето на фасадите на овие значајни објекти не придонесува само во нивно конечно зачувување туку и во промоција на градот.
„Јас се надевам дека тој проект ќе продолжи секако и во иднина и дека Охрид ќе се најде со значаен број на фасади и во идниот период затоа што конечно, ние сме должни да ја негуваме и убавата слика на градот и автентичната слика за градот, како заради вредноста на тие фасади, така заради жителите на Охрид, и секако заради бројните гости кои доаѓаат во нашиот град.“-вели Гордана Коњановска-Претседателка на Совет на општина Охрид.
Восхит од новите фасади на објектите искажаа и дел од сопствениците на објектите.
„Ова е наш објект, немам многу време да ви објаснувам, стар е повеќе од 400 години, и за прв пат после толку долго време се реконструира кровот и фасадата онака како што налагаат најсовремените прописи и за заштита и за еден објект да остане уште кој знае колку време.“-за ТВМ изјави Сулејман Џело-сопственик на објектот „Магаза“.
Инаку во рамките на проектот за обнова на фасади на објекти во старите градски јадра, досега во Охрид се целосно реновирани и завршени вкупно 13 фасади на значајни објекти и споменици на културата.
