Советот распредели дополнителни средства за реконструкција и унапредување на условите во ООУ „Григор Прличев“ и ООУ „Христо Узунов“

Советот на Општина Охрид на денешната 13. седница, со една точка на Дневен ред, донесе одлука за пренамена на средства за реконструкција и унапредување на условите во две основни училишта. Станува збор за ООУ „Григор Прличев“ – стара зграда, каде веќе се започнати градежните работи, и ООУ „Христо Узунов“ во Охрид.

За реконструкцијата на ООУ „Григор Прличев“ се пренаменуваат дополнителни 327.803 денари, кои ќе бидат искористени за поставување нова електрична инсталација на приземјето, во училниците и ходникот, демонтажа и монтажа на нова дограма на приземјето, како и поставување нови плафони во училниците и дел од ходникот.

Во ООУ „Христо Узунов“ се распоредуваат дополнителни 445.000 денари. Средствата се наменети за замена и монтажа на парни котли, како и за реконструкција на училница која ќе биде уредена како сензорна соба, со поставување кнауф, глетување и молерисување.

Средствата се пренаменуваат во рамки на Развојната програма за капитални инвестиции на Општина Охрид во областа на основното образование за периодот 2026–2028 година.