Подигнати 22 кубни метри кабаст и зелен отпад од Даљан и 8. Урбана заедница

Реализирана вонредна широко-опфатна акција за подигнување кабаст и зелен отпад во населба Даљан и кај комплексот згради на ул.,,Галичица” и ,,Никола Карев”.

Во рамки на акцијата, екипите на ЈП „Охридски Комуналец“ подигнале вкупно 22 кубни метри отпад.

Од претпријатието посочуваат дека несоодветното одлагање на стара покуќнина, кабаст и зелен отпад е честа појава, со што се нарушува изгледот на јавниот простор и животната средина.

-Ваквите слики се честа појава и не’ опкружуваат на секој чекор во урбаните заедници каде живееме, каде поединци, ослободувајќи се од непотребната покуќнина го деградираат јавниот простор кој го делиме сите ние, велат од јавното претпријатие.

Од „Охридски Комуналец“ апелираат до граѓаните да го почитуваат Календарот за подигнување кабаст и зелен отпад за 2026 година, со цел отпадот да се одлага на соодветен начин и да се придонесе за почиста и поздрава животна средина.