Три дена траше подготовката на 1600 литарската рибја чорба за Денот на рибарите. Четврта година по ред, по стариот добро познат рецепт со 400 килограми лосос, професорите и учениците од охридското средно угостителско училиште „Ванчо Питошески“, се потрудија на охриѓани и бројните гости да им зготват деликатесна рибна чорба. Подготовката на чорбата ни стана рутина, рецептот се покажа добар и не го менуваме, вели наставникот Блаже Јорданоски.
„Во подготовката на чорбата учествуваа околу 15 ученици, 8 професори и кадар од нашето училиште. Значи се подготвуваше во училиштето, морам да кажам бидејќи погрешни информации излегоа во јавноста, Тино е спонзор, меѓутоа чорбата ја подготвуваме ние“ – изјави Јорданоски.
Учениците кои учествуваа во подготовка на чорбата велат дека ова искуство е мошне значајно за нив и веруваат дека во иднина имаат можност повторно да го применат.
„Предизвик е, не е тежок, сепак чуството е големо за мене е возбудливо бидејќи прв пат учествувам и задоволен сум. Многу убаво е да се учествува во подготвувањето на рибјата чорба и искуство е. Работевме од 09 до 16 и 30, чистевме риба, подготвувавме ја варевме. Предизвикот е голем и научив да правам рибја чорба“– велат учениците.
Денот на рибарите е одлична можност за афирмација на градот, развој на верскиот туризам, но и за средба и дружба со пријателите велат охриѓани.
„Сепак поголемо внимание треба да се обрне на бројот на странски туристи, на привлекување треба ТЛЕР и Агенцијата за туризам треба да допринесат многу повеќе, не дека не се прави меѓутоа има уште многу многу за правење. Убаво многу е убаво. На денот на рибарите се собираме сите, пробуваме од вкусната чорба, ракија, вино, преубаво е и има и туристи. Ме радува ова, собирањево на луѓето убаво се сплотуваат и традицијата продолжува и понатака“.
Охридските чалгаџии за време на манифестацијата на плоштадот ги свиреа и пееја старите охридски песни, а гостите пиеја вино и ракија. Од закуските изостана печната и пржена плашица, а во казанот се крчкаше 1000 литри помалку чорба во споредба со минатата година. Втора година по ред, иако најавена, не се одржа изложбата на риболовен алат, мрежи па и слики на старите охридски рибари и чунови. Со Денот на рибарите на верскиот празник Собор на Св Јован Крстител, завршија богојавленските празнувања во Охрид.
{loadposition content9}
