Охридските капалишта обезбедени со спасители на вода. Општинскиот Црвен крст ова лето ангажира 80 обучени спасители кои ќе се грижат за безбедноста на плажите в долж Охридско-Струшкото крајбрежје, а и на Преспанското езеро. Ќе се ставени во функција пет спасителни чамци , а ќе бидат ангажирани и екипите на парамедици.
Се надеваме дека нема да имаме некои посериозни инциденти бидејќи и спасителите делуваат и превентивно со самите капачи, а концесионерите секако треба да ги следат сите инструкции, препораки и насоки кои што ги даваме, а кои се потребни за да го обезбедат самото капалиште, вели Сашо Точков, претседател на Црвен крст Охрид.
Точков објаснува дека секое капалиште треба да има пункт за укажување прва помош и набљудувачница, а најважно од се е капалиштето да биде соодветно обележано. Охридските плажи кои што се под концесија во 90% ги задоволуваат условите, што не е случај и со плажите на струшкиот дел од крајбрежјето. Таму само неколку плажи имаат ангажирано спасители.
Поголемиот дел од капалиштата во Струга не само што немаат спасители туку и ги немаат исполнето условите за безбедни капалишта, а истиот случај е и на Преспанското езеро. Очекуваме најдоцна до 15ти јули да имаме обезбедување на капалиштата и чиста ситуација, вели Точков.
После 15ти јули Црвен крст јавно ќе објави кои капалишта на Охридско-струшкото крајбрежје, а и во Преспа се обезбедени со спасители, а кои не. Тоа ќе се направи преку медиумите, во Министерството за транспорт и врски и во Охридската капетанија. Потоа останува на граѓаните самите да одлучат дали ќе одат на безбедна или на необезбедена плажа.
