Библиотеката „Григор Прличев“ никако да се прошири во новите простории. Направени се сите подготовки за преселба, останува уште да се постават уредите за ладење и греење кои се неопходни за одржување на книжниот фонд. Од библиотеката велат дека минатава година Министерството за култура не им обезбедило средства за таа намена.
Ние и покрај конкурирањето минатата година за средства од Министерството за култура за доопремување во смисла на тие грејни тела не добивме средства. Тој конкурс се повтори како и секоја година, па конкуриравме за идната година и некаде во февруари ќе бидеме начисто и ќе знаеме што точно ќе се случи и дали државата ќе има слух и конечно ќе даде средства и за таа намена, вели Милчо Јованоски-НУ Библиотека „Григор Прличев“ .
Се обидувавме и по други канали да најдеме средства, но тоа оди многу тешко бидејќи сме заглавени поради фактот што сме Национална установа, а како таква треба да не финансира државата па немаме право да аплицираме преку проекти за пари од европските фондови, објаснува Јованоски.
Библиотеката располага со богат книжен фонд, а има и дела кои се единствени и заштитени. Затоа условите под кои ќе се изложат мора да се соодветни. Првично беше замислено во просторот каде се наоѓаше „Охридско лето“ да биде сместено детското одделение со читална за деца, а еден мал простор да биде прилагоден како игротека за деца. Во делот пак каде и сега се наоѓа библиотеката да биде сместено одделението за возрасни читатели и администрацијата. Библиотеката да е од отворен тип па читателите да можат да ги разгледуваат книгите и самите да си одберат што ќе читаат. Но, ваквиот план може да претрпи и измени се со цел просторот да биде пофункционален. Ние не застануваме. Секојдневно по неколку часа работиме на пренесување на книжниот фонд во новите простории За жал морам да признам дека и со новиот простор нема да добиеме библиотека по светските стандарди. Ќе треба уште многу да се инвестира, а ни треба уште поголем простор за таква библиотека. Но сепак ќе биде многу подобро од што е сега и читателите ќе можат да бидат задоволни, вели Јованоски.
Мислам дека во првата половина на идната година како и да е ќе мора да ја завршиме таа преселба бидејќи тоа им го должиме и на граѓаните, а и себеси затоа што треба да имаме подобри услови за работа, вели Јованоски.
Инаку идејата за проширување на библиотеката „Григор Прличев“ започна уште во 2013 кога се донесе и одлука од тогашната Влада со која просториите каде функционираше НУ фестивал „Охридско лето“ и беа доделени на библиотеката на трајно користење без надомест.
