Богослужби по повод празникот Св. Еразмо Охридски

По повод празникот на светиот свештеномаченик Еразмо Охридски, во манастирот „Свети Еразмо“ кај Охрид, со почеток во 19 часот ќе биде отслужена празнична вечерна богослужба.

Со богослужбата ќе чиноначалствува Неговото Високопреосвештенство, митрополитот Дебарско-кичевски г. Георгиј.

Прославата ќе продолжи утре, на 15 јуни (понеделник), кога на самиот празник на Свети Еразмо Охридски, со почеток во 8:45 часот ќе биде отслужена света архиерејска литургија, исто така предводена од митрополитот Георгиј.

Од Дебарско-кичевската епархија ги повикуваат сите верници да присуствуваат на богослужбите и молитвено да земат учество во празнувањето на Свети Еразмо Охридски, познат како охридски чудотворец и постојан молитвен застапник пред Бога за верниот народ.

Празникот на Свети Еразмо традиционално собира голем број верници од Охрид, регионот и пошироко, кои во манастирот посветен на светителот доаѓаат да оддадат почит и да побараат духовна поткрепа и благослов.