Силен притисок врз Охридската Општа болница во омикрон бранот на ковид пандемијата. Болничките кревети и амбуланти се полнат, а бројот на новозаразени во Охрид не опаѓа.
43-ца ковид пациенти во моментов се наоѓаат на болничко лекување во охридската Општа болница. 20-мина позитивни пациенти се на инфективното одделение, а 23 на интерното одделение. Од нив 30-мина се на кислородна поддршка. Пациентите се претежно повозрасни со различни коморбидитети, а 70 проценти од нив не се вакцинирани, информира д-р Горан Балески директор на Општа болница Охрид.
Болницата е максимално оптоварена, а бројот на дневните амбулантни прегледи се движи од 160 до 170 пациенти. Другите оддели работат со нормален тек, а не се намалени оперативните програми, оперативни зафати се прават на гинекологија, хирургија и урологија. Засега модуларната болница нема да се стави во функција, додека пак наскоро се очекува да се отвори ковид центарот во Заводот за кардиоваскуларни заболувања Св. Стефан.
