Одбележан 71виот роденден на Општинската организација на Црвен крст Охрид. На 17 март 1945 година е формиран Црвениот крст на Македонија, а веднаш потоа, меѓу првите општински организации, на 26 март 1945 година е формирана охридската организација. По тој повод денес беше отворена изложба на фотографии и изданија кои го прикажуваат историјатот, формирањето, растежот и развојот на Црвениот крст на Македонија и Црвен крст Охрид.
Се одлучивме на ваков начин наодбележување на роденденот бидејќи сакавме посебно најмладите да видат преку фотографиите од нашата архива како растела и се развивала оваа хуманитарна организација. На нив ќе се пронајдат многу активисти, хуманитарци, крводарители и членови кои оставиле дел од себе во оваа организација, вели претседателот на ЦК Охрид, Сашо Точков.
71 година илјадници имени и безимени хуманисти, волонтери, членови и активисти, вработени во Црвен крст Охрид, поддржувачи, помагачи, донатори, секој на свој начин, oставале и секојдневно оставаат неизбришлива трага, печат, белег во делувањето, развојот и растежот на оваа организација. Еден од нив е и поранешниот секретар Миле Трпеноски кој се присети како било во времето кога тој бил активно вкличен во работењето на Црвен крст и како е денес.
Многу потешко се работеше во тоа време бидејќи организацијата беше во својот зародиш. Но сепак имаше интерес кај поединци, а и бројот на активистите не беше мал. Имавме подршка и од тогашното Собрание на град Охрид па полека но сигурно ја градевме оваа општинска организација. Драго ми е што денес има кој да не наследи и што со едно домаќинско работење организацијата оди само напред, вели Миле Трпеноски, поранешен секретар на ЦК Охрид.
Охридскиот Црвен крст минатата година го доби и највисокото општинско признание, наградата Св. Климент Охридски што е едно признание за неговата работа и ангажман. Неговите членови велат дека продолжуваат и понатаму со ист елан во реализација на зацртаните планови.
