Дебрчани масовно излегоа на протест и кажаа не за изградбата на регионална депонија во атарот на селото Годивје. Со двочасовен прекин на сообраќајот на патниот правец Охрид – Кичево, кај селото Ботун, уште еднаш ги изнесоа своите аргументи против регионалната депонија да се гради во Дебрца. Тука е Сини вирови најголемиот извор на питка вода во Европа кој исфрла 680 литри во секунда, кажа меѓу другото Бошко Ставрески, член на Координативното тело против изградбата на депонијата.
„Дебрца не е само еколошки чиста средина, туку има и многу други апекти со кои се брани сама. Дебрца исторски е создател на Македонската држава, таа е археолошки златен рудник на историјата на генерации кои со илајдници години живееле тука, хидробиолошки е извор од каде се напојува Охридското Езеро, културолошки е создател на многу нешта кои започнале во нашата држава“, напомена Бошко Ставрески.
Во општина Дебрца има 33 села и народот живее во склад со природата. Ние ја избравме Владата и институциите и тие треба да работат според нашите желби и потреби, порача Јадранка Бибан од Координативното тело против изградбата на депонијата.
„Ние ги изнесовме аргументите зошто сме против и не смее да се гради депонија во Дебрца. Владата да ја 
преиспита одлуката. Се разбира како кординативно тело ќе продолжиме со протестите и мерките на интернационално ниво и ќе преземаме правни постапки. Со нив ќе докажеме дека нашите факти се реални и треба да се земат во предвид ,“кажа Бибан.
Од Координативното тело кое е против изградбата на регионалната депонија во Дебрца не ја исклучуваат можноста од радикализација на протестите па дури и поведување на постапка во Стразбур.
