Детскиот филм „Брат ми брка диносауруси“ повторно ќе се прикажува во Центарот за култура „Григор Прличев“. Кино проекцијата е закажана за четврток со почеток во 18 часот.
„Брат ми брка диносауруси“ е најдобар филм за млада публика на Европската филмска академија во 2020 година. Филмот е снимен според бестселерот на Џакомо Мацариол. Станува збор за италијанска продукција во режија на Стефано Ципани, а во филмот игра и шпанската актерка Роси де Палма, муза на славниот режисер Педро Алмодовар.
Во него главен лик е Џек, кој отсекогаш посакувал да има помал брат со кого ќе си игра. Но кога Џио ќе се роди, неговите родители ќе му кажат дека неговиот брат е „посебно“ дете. Тогаш Џио станува суперхерој со волшебни моќи во имагинацијата на неговиот поголем брат, како што се суперхероите од стриповите. Со време, Џек ја дознава вистината: неговиот брат има Даунов синдром и одлучува ова да го чува како тајна. Кога ќе тргне во средно училиште и ќе ја запознае својата прва љубов Аијана, тој го крие постоењето на Џио од неа и од своите нови пријатели. Но набрзо вистината излегува на виделина и Џек сфаќа дека енергијата и виталноста на Џио се заразни.
Дистрибутер на филмот е „Катавеј“, а дистрибуцијата е помогната од ANICA, италијанското здружение кое ги претставува италијанската филмска и аудиовизуелна мултимедијална индустрија.
Картите по цена од 100 денари во продажба на билетарата при НУЦК “Григор Прличев” – Охрид. Телефон за резервации 046/261-063.
СОГЛАСНО ЗДРАВСТВЕНИТЕ ПРОТОКОЛИ СО ОГРАНИЧЕН БРОЈ НА ПУБЛИКА!
