Дружба, разговор, смеа и празнична атмосфера. Штитениците од здруженијата на лица со посебни потреби од секаков вид од Охрид и Струга денес на предновогодишен ручек во хотелот Даљан. Одговорните лица од здруженијата велат дека целта им е за своите штитеници да почувствуваат предновогодишна атмосфера и да се почувствуваат како подеднакво значаен дел од општеството.
“Ги тргаме од нивната секојдневност, да направиме нешто за нив да се почувствуваат рамноправни граѓани, да почувствуваат дека на нив се обрнува внимание, да почувствуваат дека ни претстои некој голем празник, и со тоа да ја почувствуваат радоста на животот. Нашите здруженија во текот на наредните денови исто така ќе доделат и новогодишни пакетчиња во очи Нова Година и со тоа овие лица ќе ја почувствуваат магичноста на Новата Година.”-вели Славчо Џајкоски од Здружението на слепи лица од Охрид.
Инаку денешниот свечен ручек здруженијата го финансираат благодарение на средствата собрани на приредбата “Инклузивна уметност” која тие ја организираа, а во која штитениците имаа подготвено театарски претстави, музички смотри и пантомима.
