По повод одбележувањето на месецот на ретките болести Младинската заедница при гимназијата Св „Климент Охридски“ реализираше настан насловен GIVE ME FIVE. Средношколците насликаа мурал на ѕидот на спортската сала и одржаа работилница за изработка на едукативни хамери.
Целта ни е да ја поттикнеме младата популација да се запознае со предизвиците на лицата кои страдаат од ретки болести и да им покажеме дека секој може да направи разлика со малку разбирање и солидарност, вели претседателот на младинската заедница, Иво Георгиески.
„Овај настан е целосна иницијатива на учениците, т.е на Младинската заедница при нашата Гимназија. Ние со овој настан, со сликање на мурал како и со работилница за изработка на хамери, имаме цел да ја поткрениме свеста за ретките болести како и да се придружиме на кампањата за ретките болести. Ги повикавме сите гимназијалци да учествуваат на овој настан и сме задоволни од одзивот што го добиваме. – изјави Иво Георгиески – Претседател на Младинска заедница при ОСУ „Св. Климент Охридски“.
Преку уметност и заеднички активности охридските гимназијалци испратија порака дека болeста може да биде ретка но емпатијата, солидарноста и поддршката треба да бидат постојани.
– Јас денеска се вклучив во кампањата за ретките болести со што покажуваме љубов кон децата кои живеат со ретка болест, вели Христина Волканоска
-Се вклучив во денешната кампања по повод месецот на ретки болести во нашата гимназија. Денес обојуваме раце што симболизира дека за само 5% од ретките болести има некаков лек. Сакам да порачам дека ние како заедница треба да сме свесни за луѓето кои боледуваат од ретка болест, кажа Јана Ѓореска.
-Мене ме мотивира да го нацртам овај цртеж тоа што има многу луѓе со ретки болести, децата многу страдаат и јас со ова сакам да влијаам на свеста кај младата популација дека такви болести постојат. Овие луѓе се многу горди, се силни и заедно сме посилни, порача Анастасија Атесленко.
-Моја мотивација да учествувам во оваа акција е мојот другар кој има ретка болест и главната причина за која се вклучив е дека треба да ја подигнеме свеста дека треба да помагаме и дека ретките се важни, кажа Димитар Велкоски.
Учениците како и секогаш, имаа поддршка од наставниот кадар. Горди сме на нивните иницијативи и активности кои нема да останат само на овај настан туку ќе продолжат во текот на цел февруари, вели педагогот Кристина Танеска која е и координаторка на младинската заедница.
„Ќе следат и низа други активности. Една од нив е презентација, како воспитно-образовна институција нашата цел е да ги едуцираме младите и преку тие презентации ќе ги едуцираме младите за ретките болести, зошто баш месецот февруари, видовите ретки болести и како да дадат поддршка и да се изградат во општествено одговорни граѓани.“ – кажа Кристина Танеска, педагог.
Од Младинската заедница на гимназијата упатија јавна благодарност до здружението „Ретко е да си редок” и претседателката Гордана Лолеска, за нивната посветеност во борбата гласот на ретките да биде слушнат.
Одбележувањето на светскиот Ден на ретките болести и кампањите по тој повод даваат придонес во подигнување на јавната свест со цел да се доближат проблемите и предизвиците со кои се соочуваат пациентите и нивните семејства, до јавноста и институциите и во однос на застапување и лобирање за правата на овие лица. Избран е месецот февруари бидејќи е специфичен по своите 28 или 29 дена.
