Гордана Лолеска од Охрид му донираше бубрег на својот син Давид, прва ваква трансплантација во Македонија

Гордана Лолеска од Охрид му донираше бубрег на својот син Давид, кој се соочува со ретката болест Алпортов синдром. Со оваа хумана и мајчинска одлука, таа му даде нова шанса за живот, а по тешката неизвесност, првите вести се охрабрувачки, операцијата поминала во ред.

Во кратка изјава за Викимедија, Гордана вели дека е истоштена, но среќна што сè поминало добро. Зад овие зборови стојат денови исполнети со страв, неизвесност и надеж, во кои најважно било нејзиниот син да добие можност за подобар живот.

Ова е прва ваква трансплантација во Македонија , од мајка на дете со Алпортов синдром. Од Министерството за здравство оценуваат дека нејзината одлука му овозможува на детето нова шанса за живот и претставува значаен медицински успех во третманот на пациенти со ретки заболувања.

Борбата на Гордана, сепак, не е само лична и семејна. Таа со години се залага за подобри услови за лекување и поддршка на лицата со ретки болести во Македонија. Како претседателка на здружението „Ретко е да си редок“, активно работи на подигање на јавната свест и на привлекување на вниманието на институциите кон предизвиците со кои се соочуваат овие пациенти и нивните семејства.

Нејзиниот ангажман е препознатлив и преку иницијативите за информирање и едукација за ретките болести, меѓу кои и Националната кампања „Ги запознаваме ретките болести“ и издавањето поштенски марки посветени на ретки болести.

Со донацијата за својот син, Гордана испраќа силна порака за мајчинската љубов и надежта. Нејзината приказна е и потсетник на потребата од поголема поддршка за семејствата кои се соочуваат со ретки заболувања, како и за важноста од навремена дијагностика, соодветно лекување и достапна здравствена грижа.