Шеесет студенти од холандските универзитети снимаат промотивен материјал за туристичката понуда на Охрид. Македонија оваа година е избрана за земја каде се одржува годишно собрание на најдобрите холандски академци кои студираат туристичка промоција и маркетинг. Првите впечатоци на студентите и воопшто на секој турист кој го посетил туристичкиот бисер Охрид се импресивни. Како што и самите кажаа нив ги опива прекрасната глетка на синилото од Охридското Езеро, зеленилото на НП Галичица, староградската архитектура, а гостопримството и љубезноста на месното население сметаат дека е приказна која посебно треба да се раскажува.
„Прво нешто што забележав кога слетав на аеродромот е прекрасната природа. Се беше многу светло, прекрасни зелени и сини бои, кога стигнав во хотелот, првите впечатоци се дека луѓето се многу гостопримливи расположени да помогнат. Го посетивме центарот на Охрид, многу е автентична архитектурата, ни се допадна чаршијата, и колку што одевме нагоре кон калето и тврдините таа автентична архитектура стануваше се поубава. Многу сликавме па постиравме на Инстаграм“
„Јас прво што забележав беше македонското знаме црвената и жолта боја, знаев дека ова ќе биде ново искуство за мене некој нов почеток и тоа во земја која претходно не ја знаев. Помислив колку е убаво, планините езерото, …дури и сонцето е некако поубаво овде…совршено е, како за млади така и за постари луѓе. Тука може да се планинари, да се плива, но можете да се релаксирате и во спа центрите така да има разновидна понуда на активности“- велат студентите.
Присуството на холандските студенти во Македонија, ќе биде одлично искуство за нив, бидејќи имаат можност да видат како работи еден тур оператор како и тоа да се запознаат со потенцијалот на Македонија, нагласи Франк Оздем, директорот на холандска федерација за патување и тур оператори. Тој додаде дека од нив ќе направат 60 амбасадори кои што утре ќе можат да ја промовираат Македонија и да знаат нешто повеќе за неа.
„Навистина уникатно и единствено е она што го правиме ние на ниво на цела Европа, холандските туристи во соработка со ТУИ најиновативните, имаат единствена можност да дојдат и да ја видат Македонија, а со тоа ние да формираме еден квалитетен кадар кој што понатака ќе може да остане и да работи за компанијата“
Инаку холандските студенти веќе изготвиле неколку видео материјали. Одбраниот промотивен материјал ќе биде ставен на интернет-страницата на Агенцијата за промоција и поддршка на туризмот, а тројцата најдобри студенти ќе бидат поканети повторно да дојдат во Македонија и преку размена на искуства да придонесат за развојот на македонската туристичка понуда.
