Националното здружение “Храбро срце”, најостро ги осудува случувањата на државната клиника за кардиохирургија. Растурањето на тимот, предвременото раскинување на договорот со националниот лидер ја става во колапс целата програма за срцеви трансплантации во земјава.
Со ваквите чести смени на министри, директори и останати кадри се прави ненадоместлива штета на пациентите, кои чекаат шанса за продолжување на животот.
„Постојано се трудиме да дојдеме до она што за нас живот значи до трансплантација и одеднаш да видите дека некој само поради личен хир разрешил еден цел тим кој што ги води трансплантациите. Практично во македонското здравство во областа на кардиохиругијата е во колапс. Ќе трпиме тие кои што сме најзагрозени пациенти а ке трпат и сите граѓани”, вели Васко Јолески претседател на НЗ „Храбро срце”.
Честата промена на кадри на државната клиника е обид за покривање на неспособноста од надлежните власти за одржување и обновување на државното здравство, обвинуваат од „Храбро срце”.
„Не се согласуваме дека не се добри услугите во државната кардиохирургија напротив секогаш сме биле добро опслужени, прифатени и имаме само пофални зборови за докторите. Имаме критики кон оние кои што треба да го водат здравството оние кои што внесуваат доза на политика во здравствената гранка”, додава Јолески.
Најранливите пациенти со вградена механичка циркулаторна потпора на срце апелираат до идната влада веднаш да отпочне со длабоки реформи во државното здравство, инфраструктурно подобрување на условите и вложување во современа опрема.
Новинар Соња Рилковска
