Тројка е оцената која ја добиле охридските јавни претпријатија од граѓаните за квалитетот на услугите во однос на дигитализацијата. Ова го покажале испитувањата на задоволството на граѓаните кои ги спроведе Организација на потрошувачите на Македонија. Во однос на дигиталните алатки кои ги користат охридските јавни претпријатија во моментов достапно е електронско плаќање на сметка. Претпријатијата имаат веб страна, како алатки за комуникација се користат и социјалните мрежи, но неопходни се посовремени апликациии преку кои граѓаните брзо и на едноставен начин ќе можат да поднесуваат приговори и барања.
„Нема можност дирекно на веб страната или можеби на некоја мобилна апликација секој граѓанин на Охрид кога има некој проблем да поднесе потрошувачки приговор електронски, а не да трча во самото јавно претпријатие и за истото да добие електронски, по пат на мејл, одговор, или да се преземат конкретни чекори. Истото се однесува и на поднесувања на барања кога ви треба одредена услуга , приклучок за вода, канта за отпад , паркинг за гостите доколку издавате, значи да може електронски тие барања да се поднесуваат.“ – вели Татијана Тасевска од Организација на потрошувачите на Македонија.
„Можеби општината треба да размислува за една интегрална мобилна апликација којашто ќе важи за сите јавни претпријатија, па со поделени прозорчиња за секое претпријатие, или секое претпријатие своја апликација да развие. Важно е да се поедноставни за сите корисници и поинклузивни за лицата со попречености.“ – посочува Проф. д-р.Ристо Речковски, надворешен соработник на ОПМ.
112 поплаки од граѓаните пристигнале минатата година во Канцеларијата на Организација на потрошувачите на Охрид, од кои 10% биле за услугите од јавните претпријатија.
„ Во секој случај треба да се подобрат услугите што ги даваат јавните претпријатија , секако дека има поплаки. Треба да се подигне нивото на комуникација со граѓаните, да се подигне ажурноста кога граѓаните ќе се пожалат за некој проблем., односно понавремено решавање. Поради тоа е оваа законска измена во Законот за заштита на потрошувачи, кога некој потрошувач ќе поднесе приговор, во рок од 15 дена мора да добие одговор и мора да се води статистика за приговорите од страна на јавните претпријатија.“ – вели Вангел Спироски, Организација на потрошувачи на Охрид.
Покрај усогласувањето на националното со европско законодавство кога станува збор за заштита на потрошувачите, неопходна е едукација на граѓаните за да ги знаат своите права и како можат да ги остварат истите, да си го ценат времето и секој денар.
„Сепак, јас би додал, тука најмногу е потребна едукација на граѓаните дека можат да си ги остварат своите права, има каде да се бори за своето право, постојат организации, во Охрид постои локален совет на потрошувачи , но граѓаните треба да се свесни каде да се обратат. Кога во странство може секој цент , секое евро или дел од евро да има значи на граѓаните, зошто така да не биде кај нас.“ – вели Проф. д-р. Ристо Речковски.
Истражувањето на задоволството на граѓаните е во рамки на проектот „Заедно со потрошувачите во дигитализација и модернизација на јавните комунални услуги во Општина Охрид“ кој го спроведува Организацијата на потрошувачите на Македонија (ОПМ) со поддршка од Европската унија и од Австриската Развојна агенција. На Форум кој денес се одржа во Охрид беа презентирани наодите од истражувањето и предлог насоките за подобрување на електронската достапност на административните постапки за комуналните услуги во општина Охрид.
