Управниот одбор на ЈП Охридски Комуналец на седница која се одржа денеска донесе одлука да бидат раскинати договорите со компанијата НИФИ ИК на советник во Советот на Општина Охрид поради судир на интереси. Ова доаѓа по препорака на Државната комисија за спречување корупција и мислењето кое таа го испрати до Општина Охрид дека општината не може да влегува во деловни односи со фирма каде како сопственик се наоѓа член на Советот или е во сопственост на негови блиски лица. Со фирмата НИФИ ИК , ЈП Охридски Комуналец имал склучено вкупно три договори.
„Едниот е за набавка на градежни материјали, другиот за одржување на депонијата Буково и третиот кој не е уште почнат со реализација за користење на возило со кран дигалка за сечење на опасни дрва.“- вели директорот на Охридски Комуналец , Љупчо Грданоски. 
Според директорот на Охридски Комуналец, Љупчо Грданоски најпроблематично за ЈП е поништувањето на договорот за одржување на депонијата Буково тежок околу 47 000 евра.
„За нас како ЈП најголем проблем претставува тендерот за одржување на депонијата Буково бидејќи се наоѓаме во шпицот на сезоната кога е потребно секојдневно одржување на самата депонија , рамнење на отпадот кој се одлага и во периодот кој сели се надеваме дека со нашата механизација која ја поседуваме ќе успееме барем дел од отпадот кој го носиме да го санираме да ја одржуваме депонијата се до изборот на нова фирма.“
Веднаш ќе се пристапи кон започнување на нова тендерска постапка која ќе трае најмалку месец и пол, вели Грданоски.
Инаку, денеска, Антикорупциската комисија отвори предмет за дивоградбата кај Чинарот, терасата на угостителски објект на советникот од ДУИ, Усеини. Од Антикорупциска информираа дека предметот се разгледува и дека штом се заврши ќе се даде заклучокот на Општината.
