Утре ќе се одржи јубилејна 10. ИПА велосипедска тура Охрид–Струга–Радожда
Во организација на ИПА Регион Охрид, утре ќе се одржи јубилејната десетта по ред меѓународна ИПА велосипедска рекреативна тура „Охрид–Струга–Радожда“, која и годинава ќе ги обедини љубителите на велосипедизмот од земјава и странство.
Стартот на турата е закажан за 8 часот од Градското пристаниште во Охрид. Учесниците ќе се движат по охридскиот кеј и низ дел од градските улици, по што ќе продолжат по стариот пат кон Струга, покрај брегот на Охридското Езеро и низ живописните предели кај Калишта, хотелите „Бисер“, „Изгрев“ и „Макпетрол“, сè до туристичката населба Радожда.
Велосипедската тура се реализира во рамките на проектот „ИПА Вело викенд – На точак, Охрид и Струга да видам“, чија основна цел е промоција на идејата за велосипедско поврзување на Охрид и Струга, како и продолжување на велосипедската инфраструктура кон Радожда и Пештани.
Од ИПА Охрид потсетуваат дека уште од 2016 година активно се залагаат за изградба на современа, функционална и безбедна велосипедска патека која би ги поврзала двата крајезерски града. Според нив, ваквите иницијативи имаат големо значење за развојот на туризмот, велосипедизмот и одржливата мобилност во регионот.
„Преку оваа тура сакаме да ги промовираме Охрид, Струга и целиот крајезерски регион како атрактивни туристички и велосипедски дестинации. Воедно, упатуваме апел до надлежните институции конечно посериозно да пристапат кон реализација на проектите за велосипедско поврзување на Охрид со Струга, Радожда и Пештани“, велат од ИПА Охрид.
Организаторите нагласуваат дека велосипедистите во регионот сè уште се соочуваат со недоволна инфраструктура и небезбедни услови за движење, поради што сметаат дека изградбата на велосипедски патеки треба да биде еден од приоритетите на локалните власти.
М-р Стефан Димоски, претседател на Управниот одбор на ИПА Охрид, истакнува дека целта е да се создаде силна поддршка за изградба на безбедни велосипедски патеки и подобри услови за сите велосипедисти во регионот.
По тој повод, ИПА Охрид упати јавен повик до своите членови, до велосипедските клубови од Македонија, како и до сите граѓани и рекреативци, да се приклучат на јубилејната тура и заеднички да испратат порака за потребата од развој на современа велосипедска мрежа во охридско-струшкиот регион.
Настанот е дел од активностите со кои ИПА Охрид континуирано го промовира велосипедизмот како здрав начин на живот, туристичка атракција и одржливо средство за транспорт.
