Ќе се реконструира кружниот тек на пресекот на улиците „Јане Сандански“ и „Питу Гули“. По направените сондажи од страна на стручни лица од Одделението за комунален развој, сообраќај и патишта било констатирано дека овај кружен тек кој е поставен на една многу фреквентна крстосница, има оштетувања и некои недостатоци па неопходно е да се реконструира. Најпрво се планирало само да се направат некои помали зафати, но состојбата на терен покажала дека неопходна е целосна реконструкција.
Завршена е тендерската постапка, склучен е договорот со изведувачот за реконструкција на кружниот тек „Јане Сандански“- „Питу Гули“. Планираме од наредната недела да започне реконструкцијата на таа крстосница, Томе Нанески- Одделение за комунален развој, сообраќај и патишта.
Од Одделението за комунален развој, сообраќај и патишта велат дека најважно од се е безбедноста на возачите и пешаците. Кружните текови иако во почетокот беа многу оспорувани се покажаа како добро ссобраќајно решение, посебно во летните месеци кога има поголема фреквенција на сообраќај. Пролетва планирано е да се интервенира на повеќе сообраќајници низ градов, кружните текови каде што има потреба да се доуредат и да се санираат сите оштетувања на коловозите.
Приоритет ќе биде централното градско подрачје каде што има оштетувања, главните сообраќајници па потоа ќе продолжиме и на периферијата, рече Нанески.
Инаку кружниот тек кој е на пресекот на улиците „Јане Сандански“ и „Питу Гули“ е првиот кој беше направен во градов уште во времето кога градоначалник беше Александар Петрески. Од тогаш па наваму не се вршени никакви интервенции.
