Од Центарот за управување со кризи информираат дека на подрачјето на Охрид и Дебрца нема застој на речните корита и канали од дождот кој врне вчера и денес. Прашавме дали постојат критични точки на некои речни канали и дали се исчистени сите досега лоцирани проблематични места. Од ЦУК напоменуваат дека сето тоа е во надележност на Лoкалната самоуправа. 
„Со досега направените проценки овие слаби места и точки се детектирани и останува Јавните претпријатија на Локалната самоуправа да ги рсчисти за да има поголем протек и да има безбедна зимска и рано пролетна сезона“ , вели Митко Темелкоски од ЦУК.
Допрва ќе се чисти и речниот водотек Летничка, Сушица или Грашница, кој во различни зони од градот има и различно име, а станува збор за иста река.
„Од Езерка до Туристичка се расчистува. За 10 до 15 работни денови ќе има расчистување на одредени делови “, информира Темелкоски.
Очекуваат и потегот на Коселска река кај Лакочереј и Орман да биде расчистен за кратко време .
Од Локалната самоуправа денес не успеваме да добиеме информација како течат работите со расчистувањето на критичните речни канали. Иако во месец август кратко брифираа дека за одржувањето на речните корита и канали почнале да преземаат активности по поплавите во Скопје и расчистувањето треба да заврши до 15 септември. Во соопштението испратено до ТВМ беше наведено :
„ Во насока на навремена подготвеност од можни елементарни непогоди, Општина Охрид пред еден месец (јули) започна акција на чистење на сите речни корита и канали на територијата на општината. Акцијата што е во тек треба да заврши на 15 септември. Во чистењето се вклучени екипи и механизација на ЈП „ Охридски комуналец“.
За чистење на речните корита и канали согласно Развојната програмата Општина Охрид од својот буџет има издвоено 4 милиони денари, а за механизацијата што се користи на терен обезбедени се 4 тони нафта, поддршка од Министерството за животна средина на Р. Македонија.
