Муслиманската капела доби темели и на тоа остана. Изградбата е стопирана скоро година дена поради немање на доволно финансии и за истата не е прибрана потребната техничка документација, информираат од ЈП „Градски гробишта“. Првиот човек на ЈП, Драган Пандески, вели дека од нивна страна вложуваат максимални напори за да се изгради овој објект, но признава дека работите одат тешко. Тој додава дека клучот за изградба е во Министерството за финансии кое не го одобрила кредитот наменет за изградба на капелата.
„Во моментов немаме изведувач. Вие знаете дека Советот на општина Охрид донесе одлука за кредитно задолжување, баш за изградба на оваа капела. Бидејќи не добивме согласност од Министреството за финансии за кредит во вредност од 3,5 милиони денари, а најдовме банка која ни го одобри кредитот, но без тие средства не може да бараме инвеститор“ – вели Пандески.
На 16 ти декември годинава се навршува точно една година откако беа удрени темелите за градба на најсовремената капела како што тогаш ја најави првиот човек на градот Александар Петрески. Според тогашните најави на градоначалникот Петрески муслиманската капела требаше да биде готова оваа пролет.
Муслиманските верници сеуште ќе треба да чекаат додека се исполни ветената заложба на Петрески, да добијат современа капела. Сеуште во христијанската капела нема услови за обред на покојните од муслимансака вера, вели Пандески.
„Муслиманите обредите ги врши секој во својот дом, бидејќи тие во нашата христијанската капела не ги носат покојните“-вели Пандески.
Во моментов на локацијата на охридските градски гробишта каде што треба да се гради муслиманската капела просторот се тампонира, поради зимските услови, вели Пандески. За изградба на овој објект потребни се 6 милиони денари, средства кои треба да се обезбедат дел од донации, дел од општината а свој дел ќе има и ЈП. Муслиманската капела треба да се гради по Европски стандарди, со сите пропратни содржини. Истата ќе зафаќа површина од 220 квадратни метри вклучувајќи го тука и дворното место.
{loadposition content9}
