Излегоа квотите за прием на нови студенти на државните факултети. Охридскиот факултет за туризам и угостителство оваа академска 2017- 2018 година, доби добра квота од 430 нови студенти. Деканот на факултетот Цветко Андреески вели застапени се сите студиски програми, но откри и една новина во тој дел.
„Она што е ново за оваа академска година е обновување на квотата за студиска програма безбедност и финансиска контрола и очекуваме поголем интерес за нови студенти во однос на она што го имавме минатите години“.
Минатите години во трите уписни рокови на факултетот за туризам и угостителство се запишуваа по 300 студенти. Отприлика толкав број на студенти деканот очекува и за оваа година. Андреески смета дека новата студиска програма која ја најави ќе предизвика голем интерес кај студентите.
„Претпоставувам дека најголем интерес ќе има за безбедност и финансиска контрола, според искуствата од периодот кога имавме квота за оваа студиска програма се разбира дека доста атрактивни се и царина и шпедиција, осигурување“.
Покрај овие програми, голем е интересот на новите академци и за студиската програма туризам које е носечка на ФТУ. Андреески нагласи дека дипломците кои што излегуваат од ФТУ се големи професионалци во струката и барани, како во нашата земја, така и во странство.
