Охриѓани и туристите денес одблиску можеа да се информираат што е тоа згрижувачко семејство. На градскиот плоштад беше промовирана кампањата „На секое дете му треба семејство“ од страна на охридскиот центар за социјални работи, претставник од УНИЦЕФ и Локалната самоуправа. Кампања на министерството за труд и социјална политика која ги мотивира македонските граѓани да згрижуваат деца тече од први јуни. Неим Сулејман, в.д. директор на охридскиот центар за труд и социјална политика, информира каков е досегашниот ефект од оваа кампања во Охрид.
Досега имаме само една жена која е која е заинтересирана да згрижи дете.Се надеваме дека во текот на кампањата ќе има повеќе заинтересирани лица, вели Сулејмани.
Во моментов во Охрид има 3 згрижувачки семејства кои се грижат за 9 деца. Шест деца од Охрид кои останале без родителска грижа се сместени во згрижувачки семејства во Прилеп и Кривогоштани. Но , преставниците од УНИЦЕФ се убедени дека кај охриѓани постои таа хумана димензија и дека оваа бројка значително ќе се зголеми.
Јас познавам многу луѓе од Охрид кои имаат големо срце и душа и верувам дека дел од нив ќе се пријават да ја споделат таа љубов која ја чуваат во себе токму за овие деца на кои им е тоа најмногу потребно. Верувам дека во Охрид ќе имаме многу згрижувачки семејства и дека ќе биде еден од градовите за пример, вели Елена Галарова Велковска, детска заштита на УНИЦЕФ.
И Локалната самоуправа се приклучува кон кампањата за потикнување на свеста на граѓаните кои имаат можност и услови да станат згрижувачко семејство. Претседателката на Совет ги повика граѓаните на Охрид да се вклучат во кампањата и да придонесат за децата без родителска грижа да бидат згрижени и да растат безбедно во семејство во кое ќе им биде пружена љубов.
Ова е само почеток. Локалната самоуправа целосно ќе се вклучи во оваа кампања и се надевам дека ќе успееме да мотивираме повеќе семејства прњеку анимација на граѓаните кои ќе се мобилизираат и ќе згрижат деца на кои им е потребен топол дом, вели Ангелоска.
Интересот во РМ е различен. Има градови со голем број на згрижувачки семејства и градови во кои нема згрижувачки семства. Затоа оваа кампањата има за цел да ги анимира и поттикне сите граѓани да се приклучат да има што повеќе згрижувачки семејства. Инаку, додатокот за згрижувачите за деца од предучилишна возраст изнесува 8 125ден., за училишна возраст 9 375ден., а за дете со пречки во развој 10 625ден.
