Климатските промени драстично ги намалија годишните приноси на мед. Пчеларите од охридскиот регион велат опстојуваат на прагот на рентабилност. Има пчеларници кои годинава калкулираат од 90% до 100 % загуби.
Последниве години пчеларството во регионот бележеше подем, нови млади луѓе започнаа да се занимаваат со пчеларење, но овие состојби негативно влијаат дел од нив веќе се откажуваат.
-За жал, немоќни сме најчесто против климатските промени. Пролетниот период, тоест зимата, имавме огромни загуби на пчелни семејства. Консензуален заклучок е дека тоа се должи на недостаток на полен во изминатата година, се одгаи неквалитетно легло, излегоа неквалитетни пчели и за жал не се направи смена на генерации и загубите беа во јануари и февруари, вели Наум Трпчески претседател на Здружението на пчелари Охрид.
Дел од пчеларите се регистрирани како оператори со храна. Велат поради минималните приноси и високите цени доста е намалена продажбата на природен мед.
-Ги имаме сите пчелни производи, како пчеларската фарма се трудиме да бидеме што поиновативни, што потрадиционални, да опстоиме да понудиме на потрошувачите она што е природно, што го дава природата, што го собираат пчелите и преку тоа да го понудиме на конзументи, вели Тони Јосифоски пчелар.
Државата дава поддршка 10 евра по пчелно семејство, но според пчеларите потребно е зголемување, воведување субвенциии во опрема за мотивација на нови пчелари, како и намалување на минималниот праг за аплицирање во ИПАРД програмите.
Новинар Соња Рилковска
