Од полноќ бензините поевтинуваат за седум денари, дизелот за 5,5 денари

Регулаторната комисија за енергетика денес донесе одлука за поевтинување на нафтените деривати во просек за 7,51 проценти во однос на цените утврдени на 2 ноември.

Бензините Еуросупер БС-95 и БС-98 поевтинуваат за седум денари по литар, па новата цена на 95-ката изнесува 86 денари, а на 98-ката 88 денари за литар.

Дизелот поевтинува за 5,5 денари и ќе се продава по 94,5 денари за литар, додека екстра лесното масло за домаќинство се намалува за 6,5 денари, на 103,5 денари за литар. Поевтинува и мазутот, за 6,26 денари по килограм, на 49,31 денар.

Намалувањето на цените е резултат на падот на берзанските цени на нафтените деривати, понискиот курс на доларот, но и владините мерки за намалување на акцизите за бензините и дизелот. За бензините акцизата е намалена за два денара, а за дизелот за четири денари по литар.

Дополнително, за дизелот е применета и намалена стапка на ДДВ од 10 проценти.